ودار الحوار بينهما كالتالى:

أمينة خليل: "الحقنى يا كبير نفادى عاوز يسيبنى رغم إنى عملت كل حاجة، اعتزلت الفن عشان أتفرغ له وغيرت اسمى على فيس بوك لحبيبة نفادى وبرضه مش عاجب".

ورد نفادى عليها: "بصراحة يا كبير تليفونى مبطلش رن مؤلفين ومخرجين عاوزينها فى أعمال وبيلمونى إنى خليتها تعتزل وبصراحة عندهم حق يا أمينة الفن محتاجك أكتر منى، يمكن فى زمن أو وقت أو مسلسل تانى كنا ننفع لبعض، ويا أمينة أنا مش متخيل التليفزيون من غيرك، موسم رمضان يعدى إزاى من غير وجودك، أنا حطيت نفسى مكان الجمهور إزاى أحرمهم من المتعة دى، لا يمكن أبنى سعادتى على حساب تعاستك انتى والجمهور، مع السلامة يا منمن".

ليقول الكبير لنفادى: "إيه السبب الحقيقى لترك أمينة"، ليقول له: "أمينة مابتفهمش إيفهاتى، وبصراحة النجم محمد ممدوح جه وهددنى عشان عاوزها تشتغل معاه فى المسلسل الجديد، ولو رفضت هيلعب معايا لعبة نيوتن".

وبدأت الحلقة الخامسة من المسلسل أن الكبير بدأ خطته لمساعدة نفادى حاتم صلاح الزواج من النجمة أمينة خليل بعد وصولها المزاريطة، وجاء هجرس محمد سلام كأنه الشرير أوى، ثم جاء نفادى لإنقاذها ولكنها دخلت فى خناقة مع نفادى.

ولم تدخل عليها الخطة الأولى، لينتقل الكبير إلى الخطة الثانية وأخد الكبير أمينة خليل للتجول فى المزايطة ولكنها تفشل أيضا وتتعاطف مع كل أهالى المزاريطة إلا نفادى.

مسلسل الكبير أوى 8 بطولة أحمد مكي، رحمة أحمد، بيومي فؤاد، مصطفى غريب، هشام إسماعيل، محمد سلام، سماء إبراهيم، حسين أبو حجاج، حاتم صلاح، وغيرهم من الفنانين، بالإضافة إلى ظهور عدد من ضيوف الشرف، والعمل من إنتاج شركة سينرجي، تأليف مصطفى صقر، محمد عز الدين، وإخراج أحمد الجندي.